ஒவ்வொரு தடவையும் புதுப்புது விளம்பர யுக்தியை வெளிபடுத்தி அதில் வெற்றி பெறுவது என்பது சுலபமான விஷயமில்லை. அதிலும் முற்றிலும் புதுமுகங்கள் பங்காற்றிய படமென்றால் விளம்பர யுக்திக்கான மெனக்கெடல் அதிகமாகவே இருக்க வேண்டும். அந்த சவாலில் "வி 1" படக்குழு வெற்றி பெற்றிருக்கிறது என்று தான் சொல்லவேண்டும்.
படத்தின் கதை புலனாய்வு சம்பந்தப்பட்டதால், அதனடிப்படையில், "வி 1" குழுவினர் ஒரு புதிர் வைத்தனர். பாலியல் கொடுமைகளிலிருந்து குழந்தைகள் எச்சரிக்கையாக இருக்கவேண்டும் என்கிற விழிப்புணர்வை தூண்டும் வகையில் ஒரு போஸ்டரில் 8 எழுத்துக்கள் மறைந்துள்ளது என்றும் அந்த எழுத்துக்களை ஒன்று சேர்த்தால் ஒரு வார்த்தை உருவாகும் என்றும் கூறியிருந்தனர். அவர்களது டிவிட்டர் பக்கம் சரியான விடையான Bad Touch எனும் வார்த்தைகளால் நிரம்பி வழிய, இந்திய அளவில் டிரெண்டிங்கும் ஆனது, அதன் மூலம் படத்திற்கு மிகச்சிறந்த விளம்பரம் கிடைத்திருப்பதாக வி1 குழுவினர் தெரிவித்தனர். குலுக்கல் முறையில் தேந்தெடுக்கப்படும் ரசிகருக்கு 8 கிராம் தங்கச் சங்கிலி காத்திருக்கிறது.
தங்களது முதல் போஸ்டரிலும் இது போன்ற புதிர் வைத்து குலுக்கல் முறையில் வென்றவருக்கு "வி 1" படக்குழுவினர் ஏ.சி பரிசாக அளித்துள்ளனர் என்பது குறிப்பிடத்தக்கது.
பேரடைம் பிக்சர் ஹவுஸ் மற்றும் கலர்புல் பீட்டா முவ்மண்ட் ஆகியோர் இணைந்து தயாரித்திருக்கும் இந்தப்படம் டிசம்பர் 6 ஆம் தேதி வெளியாகத் திட்டமிடப்பட்டிருக்கிறது. பாசிடிவ் ப்ரிண்ட் ஸ்டுடியோஸ் சார்பாக L.சிந்தன் இப்படத்தை வெளியிடுகிறார்
கதாநாயகனாக ராம் அருண் காஸ்ட்ரோ, கதாநாயகியாக விஷ்ணு பிரியா இவர்களுடன் லிஜேஷ், மைம் கோபி, காயத்ரி, லிங்கா, மோனிகா, மனிஷா ஜித் உள்ளிட்ட பலர் நடித்துள்ளனர்.
கதை, திரைக்கதை, வசனம், இயக்குகிறார் பாவெல் நவகீதன். கிருஷ்ண சேகர் டி எஸ் ஒளிப்பதிவு செய்ய, ரோனி ரப்ஹெல் இசையமைத்திருக்கிறார்.
