ஃப்ளக்ஸ் பிலிம்ஸ் தயாரிக்க, ஏகே இயக்கத்தில் துருவா , இந்துஜா நடிப்பில் உருவாகியுள்ள படம் 'சூப்பர் டூப்பர்'.
' சூப்பர் டூப்பர்' படம் பற்றிய தன் அனுபவங்களைக் கூறுகிறார் நடிகர் துருவா, “80களிலிருந்து 90 கள் வரையில் வெளிவந்த அனைத்து அம்சங்களும் நிறைந்த வெற்றிப்படங்களைப் போலவே சூப்பர் டூப்பர் படத்திலும் சண்டை, காதல், நகைச்சுவை மற்றும் திருப்பங்கள் நிறைந்து இருக்கும்.
இப்படத்தில் என் கதாபாத்திரத்தின் பெயர் சத்யா. ஆனால், வாய் திறந்தால் பொய் தான் சொல்லுவேன். பொய் சொல்வேனே தவிர, கெட்டவன் கிடையாது. ஒரு பொய் சொல்லி கதாநாயகியிடம் ஒரு சிக்கலில் மாட்டிக் கொள்வேன்.நெருங்கிப் பார்த்தால் நாயகியும் ஒரு சிக்கலில் இருப்பார். தங்கள் சிக்கல்களிலிருந்து அவர்கள் 2 பேரும், அதாவது நாங்கள் எப்படி வருகிறோம் என்பதை விறுவிறுப்பான அதே நேரம் சோர்வு தட்டாத திரைக்கதையுடன் சொல்லியிருக்கிறர் இயக்குநர்.இரண்டு மணிநேரம் ஓடும் இந்தப்படத்தில் இரண்டு வினாடிகள் கூட உங்கள் கவனம் சிதறாது.
இது எனக்கு இரண்டாவது படம், ஒரு புதுமுக நாயகன் முழுநீள படத்தில் நடிப்பது பற்றிச் சிலர் விமர்சனம் செய்யலாம் . ஆனால் அதையும் நியாயப்படுத்துகிற மாதிரி காட்சிகளும் என் பாத்திர சித்தரிப்பும் இதில் இருக்கும். என் உயரம் எனக்குத் தெரியும் நான் நீந்த வேண்டிய நீர் நிலையின் ஆழமும் எனக்குத் தெரியும் எனவே ஆழம் தெரியாமல் காலை விடவில்லை. எல்லாம் சரியாகப் பொருத்தமாக இருக்கிறது .இதைப் படம் பார்ப்பவர்கள் ஒப்புக்கொள்வார்கள்…” என்றார்.
கதாநாயகியைப் பற்றி கேட்டபோது, “ இந்துஜா, சினிமாவையும் தன் பாத்திரத்தையும் புரிந்து கொண்டு இதில் நடித்திருக்கிறார் .ஒரு வளரும் நடிகையாகத் தன்னைப் புரிந்து கொண்டு சூப்பர் டூப்பர் பாத்திரத்தை உணர்ந்து சிறப்பாக நடித்திருக்கிறார். படித்த தைரியமான நகர்ப்புறத்தில் இருக்கும் நவீன பெண்ணாக இந்துஜா வருகிறார் .
இப் படப்பிடிப்பின் 55 நாட்களும் நல்ல நட்பு சூழலில் கழிந்ததை எங்களால் மறக்கமுடியாது…” என்றார்.
மற்ற நடிகர்கள் பற்றி…
என் நண்பனாக ஷாரா நடித்துள்ளார். அவரும் நானும் படம் முழுவதும் நகைச்சுவையில் கலக்கி இருக்கிறோம். மறைந்த நடிகர் தேங்காய் சீனிவாசனின் பேரன் ஆதித்யா வில்லனாக வருகிறார். அவருக்கும் இது நல்ல பெயர் வாங்கித்தரும்
எதிர்கால இலக்கு பற்றி..
வாய்ப்புக்காக ஆசைப்பட்டு சுமாரான கதைகளில் நடிக்க நான் தயார் இல்லை என்னை ஆச்சரியமூட்டும் வகையில் கதை அமைந்தால் நான் நடிக்கத் தயாராக இருக்கிறேன். வாய்ப்பு வந்தால் போதும் என்று அடுத்தவர் வலிகளில் கைத்தட்டல் வாங்குவதில் எனக்கு உடன்பாடில்லை
தளபதிரத்னம் – சுந்தர்ராம் ஆகியோர் ஒளிப்பதிவு செய்ய, திவாகரா இசையமைக்கும் சூப்பர் டூப்பர் விரைவில் வெளியாகவிருக்கிறது.
